TN Budget 2025: காலை உணவு திட்டம் அரசு உதவி பெறும் பள்ளிகளுக்கு நீட்டிப்பு!

Tamil Nadu Budget 2025: தமிழ்நாட்டின் நகர்ப்புறங்களில் உள்ள அரசு உதவி பெறும் பள்ளிகளுக்கும் காலை உணவுத் திட்டம் நீட்டிக்கப்படுவதாக தமிழக பட்ஜெட் 2025-ல் இன்று (மார்ச் 14, 2025) அறிவிக்கப்பட்டுள்ளது.

காலை உணவுத் திட்டம்

BySaranya JK

Published on: March 14, 2025 at 3:04 pm

சென்னை, மார்ச் 14 2025: முதலமைச்சரின் காலை உணவுத் திட்டம் செயல்படுத்தப்பட்டதைத் தொடர்ந்து மாணவர்களின் வருகை அளவும் அவர்களின் ஊட்டச்சத்து மற்றும் கற்றல் திறன்களும் கணிசமாக மேம்பட்டுள்ளதாக தமிழக நிதியமைச்சர் தங்கம் தென்னரசு தமிழக சட்டப்பேரவையில் இன்று (மார்ச் 14 2025) அறிவித்தார்.

தமிழ்நாடு நிதியமைச்சர் தங்கம் தென்னரசு இன்று தமிழ்நாட்டின் வரவு செலவு திட்ட அறிக்கையை தாக்கல் செய்தார். அப்போது, பள்ளிகள் தொடர்பான ஆய்வுகள் காட்டியுள்ளதை சுட்டிக்காட்டிய அமைச்சர், அடுத்த கல்வியாண்டில் நகர்ப்புறங்களில் உள்ள அரசு உதவி பெறும் பள்ளிகளையும் உள்ளடக்கும் வகையில் மேலும் விரிவுபடுத்தப்படும் என்றார்.

அப்போது பேசிய அமைச்சர், “இதன் மூலம் முதலாம் வகுப்பு முதல் ஐந்தாம் வகுப்பு வரை சேரும் கூடுதலாக 3.14 லட்சம் மாணவர்கள் பயனடைவார்கள் என்றார். மேலும் வரும் நிதியாண்டில் இதை செயல்படுத்த ரூ.600 கோடி ஒதுக்கப்பட்டுள்ளது” என்றார். தொடர்ந்து, அங்கன்வாடி மையங்களில் அத்தியாவசிய வசதிகளை உறுதி செய்வதற்காக, தற்போது வாடகை கட்டிடங்களில் இயங்கும் 500 மையங்களுக்கு புதிய கட்டிடங்கள் கட்டப்படும் என்று அமைச்சர் கூறினார்.

இதற்காக ரூ.83 கோடி ஒதுக்கீடு செய்யப்பட்டுள்ளது என்றார். மேலும், 2025-26 பட்ஜெட் மதிப்பீடுகளில் ஒருங்கிணைந்த குழந்தை மேம்பாட்டுத் திட்டத்திற்கு ரூ.3,676 கோடி ஒதுக்கப்படும் என்றும் அமைச்சர் கூறினார். இதற்கிடையில், பட்ஜெட் மதிப்பீடுகளில், சமூக நலன் மற்றும் பெண்கள் அதிகாரமளித்தல் துறைக்கு ரூ.8,597 கோடி ஒதுக்கீடு செய்யப்பட்டுள்ளது குறிப்பிடத்தக்கது.

இதையும் படிங்க : ஊட்டி, கொடைக்கானல் சுற்றுலா வாகனங்களுக்கு கட்டுப்பாடு.. மீண்டும் இ-பாஸ்.. சுற்றுலாப் பயணிகள் நோட் பண்ணுங்க!