பழவேற்காடு பறவைகள் சரணாலயத்தில் மதுக்கடை அமைப்பதா? அன்புமணி ராமதாஸ் கடும் கண்டனம்

Anbumani Ramadoss: பழவேற்காடு பறவைகள் சரணாலயத்தில் மதுக்கடை அமைப்பதா என தமிழக அரசுக்கு கேள்வியெழுப்பியுள்ளார் பா.ம.க. தலைவர் அன்புமணி ராமதாஸ்.

அன்புமணி ராமதாஸ்

BySaranya JK

Published on: September 20, 2025 at 2:54 pm

சென்னை, செப்.20, 2025: பா.ம.க தலைவர் அன்புமணி ராமதாஸ் இன்று (சனிக்கிழமை) விடுத்துள்ள அறிக்கையில், “ சென்னையை அடுத்த பழவேற்காடு ஏரிக்கு அருகில் உள்ள பழவேற்காடு பறவைகள் சரணாலயத்தில் தமிழக அரசின் டாஸ்மாக் நிறுவனம் விதிகளை மீறி மதுக்கடையை அமைத்து நடத்தி வருகிறது. மக்களுக்கு பாதிப்பை ஏற்படுத்தும் வகையிலும், சுற்றுச்சூழலை அழிக்கும் வகையிலும் தமிழக அரசு மேற்கொண்டிருக்கும் இந்த நடவடிக்கை கண்டிக்கத்தக்கது” எனத் தெரிவித்துள்ளார்.

மேலும், “பறவைகள் சரணாலயத்தில் மதுக்கடைகளை அனுமதிப்பது சட்டவிரோதம் ஆகும். சர்ச்சைக்குரிய மதுக்கடை இதற்கு முன் பழவேற்காடு நகரப் பகுதிக்குள் செயல்பட்டு வந்திருக்கிறது. அங்கு குடிகாரர்கள் தொல்லை அதிகரித்ததைத் தொடர்ந்து சில வாரங்களுக்கு முன் இந்த இடத்திற்கு மதுக்கடை மாற்றப்பட்டுள்ளது“ எனத் தெரிவித்துள்ளார்.

மேலும், “பறவைகள் சரணாலயம் பாதிக்கப்பட்டாலும் பரவாயில்லை… மழை நீர் வடிவதற்கான கால்வாய் பாதிக்கப்பட்டாலும் பரவாயில்லை… மதுக்கடைகளை அமைப்பது தான் என்று திமுக அரசு செயல்படுவதிலிருந்தே மக்கள் நலனில் அதற்கு அக்கறை இல்லாததை உணர்ந்து கொள்ள முடியும். இவ்வாறு மது வணிகத்தை மட்டும் முதன்மை நோக்கமாகக் கொண்டு செயல்படும் திமுக அரசை வரும் தேர்தலில் மக்கள் வீழ்த்தி வீட்டுக்கு அனுப்புவார்கள். இது உறுதி” எனக் குறிப்பிட்டுள்ளார்.

இதையும் படிங்க : 9 மாதங்கள் கடந்த பின்னரும் நெற்பயிர்களுக்கு இழப்பீடு இல்லை.. இதுதான் திராவிட மாடலா? அன்புமணி ராமதாஸ்