சீனா மாஸ்டர்ஸ் பேட்மிண்டனில் சாம்பியன்! சாட்விக்–சிராக் ஜோடி வரலாற்று சாதனை

China Masters Win: சீனா மாஸ்டர்ஸ் பேட்மிண்டன் தொடரின் ஆடவர் இரட்டையர் பிரிவில் சாட்விக்சாய்ராஜ் ரங்கிரெட்டி–சிராக் ஷெட்டி ஜோடி சாம்பியன் பட்டம் வென்று வரலாறு படைத்துள்ளது. இதன் மூலம் சீனா மாஸ்டர்ஸ் தொடரில் இந்தியா முதல் முறையாக பட்டம் வென்றுள்ளது.

சிராக் ஷெட்டி, சாட்விக்சாய்ராஜ் ரங்கிரெட்டி

ByPunitha Rajesh

Published on: September 7, 2026 at 4:26 pm

ஷென்சென், செப். 7 2026: சீனா மாஸ்டர்ஸ் பேட்மிண்டன் தொடரின் ஆடவர் இரட்டையர் பிரிவில் இந்தியாவின் சாட்விக்சாய்ராஜ் ரங்கிரெட்டி–சிராக் ஷெட்டி ஜோடி சாம்பியன் பட்டம் வென்றது. நேற்று நடைபெற்ற இறுதிப்போட்டியில் சீனாவின் ஹீ ஜி டிங்–ரென் சியாங் யூ ஜோடியை 11-21, 21-13, 21-17 என்ற செட் கணக்கில் வீழ்த்தி இந்திய ஜோடி வெற்றி பெற்றது. இதன் மூலம் சீனா மாஸ்டர்ஸ் தொடரில் இந்தியா முதல் முறையாக சாம்பியன் பட்டத்தை கைப்பற்றியுள்ளது.

இந்த வெற்றி நடப்பு சீசனில் சாட்விக்–சிராக் ஜோடிக்கு கிடைத்த 2-வது பட்டமாகும். இதற்கு முன்பு சிங்கப்பூர் ஓபன் சூப்பர் 750 தொடரில் இருவரும் சாம்பியன் பட்டம் வென்றிருந்தனர். மேலும், தாய்லாந்து ஓபன் சூப்பர் 500 தொடரில் 2-வது இடத்தைப் பிடித்திருந்தனர். இதனால் இந்த சீசனில் இந்திய ஜோடி தொடர்ந்து சிறப்பான ஆட்டத்தை வெளிப்படுத்தி வருகிறது.

சீனா மாஸ்டர்ஸ் இறுதிப்போட்டிக்கு முன்னேறிய சாட்விக்–சிராக் ஜோடி, அரையிறுதியில் மலேசியாவின் நூர் முகமது அஸ்ரின் அயூப்–டான் வீ கியோங் ஜோடியை 21-15, 18-21, 21-11 என்ற செட் கணக்கில் வீழ்த்தியது. கடுமையான போட்டிக்குப் பிறகு வெற்றி பெற்ற இந்திய ஜோடி, இறுதிப்போட்டியிலும் முதல் செட்டில் தோல்வியடைந்த போதிலும் அடுத்த இரண்டு செட்களிலும் சிறப்பாக விளையாடி பட்டத்தை கைப்பற்றியது.

சீனா மாஸ்டர்ஸ் தொடரில் சாட்விக்–சிராக் ஜோடிக்கு இது குறிப்பிடத்தக்க முன்னேற்றமாகும். இருவரும் 2023 மற்றும் 2025-ம் ஆண்டுகளில் 2-வது இடத்தையும், 2024-ம் ஆண்டு அரையிறுதி இடத்தையும் பிடித்திருந்தனர். தற்போது 2026-ம் ஆண்டு இறுதிப்போட்டியில் வெற்றி பெற்று முதல்முறையாக சாம்பியன் பட்டத்தை கைப்பற்றியுள்ளனர். இந்த வரலாற்று வெற்றி இந்திய பேட்மிண்டனுக்கு மேலும் ஒரு முக்கியமான சாதனையாக அமைந்துள்ளது.

இதையும் படிங்க: பாகிஸ்தானை 55 ரன்களுக்கு சுருட்டிய இந்தியா! 7 விக்கெட் வித்தியாசத்தில் அபார வெற்றி