சல்மான் கான் தந்தைக்கு திடீர் உடல்நலக்குறைவு.. மருத்துவமனையில் அனுமதி!

Salim Khan: சல்மான் கான் தந்தைக்கு திடீர் உடல் நலக்குறைவு ஏற்பட்டுள்ளது. அவரை காண சல்மான் கான் மருத்துவமனைக்கு சென்றுள்ளார்.

தந்தையுடன் சல்மான் கான்

ByAkila Ramakrishnan

Published on: February 17, 2026 at 3:08 pm

மும்பை, பிப்.17, 2026: மகாராஷ்டிரா மாநிலம் மும்பை லிலாவதி மருத்துவமனையில் மூத்த திரைக்கதை எழுத்தாளர் சலீம் கான் அனுமதிக்கப்பட்டுள்ளார். அவரது உடல்நிலை குறித்து மேலும் விவரங்கள் இன்னும் வெளியாகவில்லை; அனுமதிக்கப்பட்ட காரணமும் அதிகாரப்பூர்வமாக அறிவிக்கப்படவில்லை.

இந்த நிலையில் தந்தையை காண அவரது மகன், சூப்பர் ஸ்டார் சல்மான் கான், இன்று காலை மருத்துவமனைக்கு வந்தார். கருப்பு டி-ஷர்ட் மற்றும் தொப்பி அணிந்து, பாதுகாப்பு பணியாளர்களால் சூழப்பட்டிருந்த சல்மான் கான், ஊடகங்களிடம் பேசாமல் மருத்துவமனையை விட்டு வெளியேறினார்.
மேலும், சலீம் கான் மருத்துவமனையில் அனுமதிக்கப்பட்டதற்கான காரணம் குறித்து கான் குடும்பத்திடமிருந்து எந்த அதிகாரப்பூர்வ அறிக்கையும் வெளியாகவில்லை. ரசிகர்கள் சமூக வலைதளங்களில் கவலை தெரிவித்தும், விரைவில் குணமடைய வாழ்த்துகளையும் தெரிவித்துள்ளனர்.

இதையும் படிங்க: ஷாருக் போன்ற ஹீரோவை பார்த்ததில்லை.. அனுபவ் சின்ஹா

90 வயதான சலீம் கான், இந்தி சினிமா வரலாற்றில் மிகச் செல்வாக்கு வாய்ந்த திரைக்கதை எழுத்தாளர்களில் ஒருவராகக் கருதப்படுகிறார். சலீம் கான், ஜாவேத் அக்தருடன் இணைந்து ‘சலீம்–ஜாவேத்’ என்ற புகழ்பெற்ற ஜோடியாக 1970களில் இந்தி சினிமாவை மறுவடிவமைத்தார். ஷோலே உள்ளிட்ட பல புகழ்பெற்ற படங்களை எழுதியுள்ளனர்.

தீவார், ஜஞ்சீர், டான் போன்ற படங்கள் “கோபமான இளைஞன்” காலத்தை உருவாக்கின. அவர்களின் எழுத்து, கதை சொல்லும் முறையை மாற்றியதோடு, திரைக்கதை எழுத்தாளர்களின் நிலையை உயர்த்தியது.
இந்த நிலையில், 2025 நவம்பரில் சலீம் கான் தனது 90வது பிறந்தநாளைக் கொண்டாடினார் என்பது குறிப்பிடத்தக்கது.

இதையும் படிங்க: பொன்னியின் செல்வன் பாடல் காப்பியா? சிக்கலில் ஏ.ஆர். ரஹ்மான்.. ரூ.2 கோடி டெபாசிட் செய்ய உத்தரவு!