கிறிஸ்துமஸ் பண்டிகைக்கு வெளியாகும் ஜீவாவின் ‘தகப்பன்’… ரிலீஸ் தேதி தெரியுமா?

Thagappan Release date: நடிகர் ஜீவா நடிக்கும் ‘தகப்பன்’ திரைப்படம் டிசம்பர் 24-ஆம் தேதி உலகம் முழுவதும் திரையரங்குகளில் வெளியாகிறது.

‘தகப்பன்’ திரைப்படம்

ByThilahavathy P

Published on: October 24, 2026 at 5:08 pm

சென்னை, அக். 24 2026: நடிகர் ஜீவா நடிப்பில் உருவாகியுள்ள ‘தகப்பன்’ திரைப்படம் வரும் டிசம்பர் 24-ஆம் தேதி உலகம் முழுவதும் திரையரங்குகளில் வெளியாகும் எனப் படக்குழு அறிவித்துள்ளது. லார்க் ஸ்டூடியோஸ் தயாரிக்கும் இப்படத்தின் வெளியீட்டுத் தேதியைப் புதிய போஸ்டருடன் படக்குழு வெளியிட்டுள்ளது. கிறிஸ்துமஸ் பண்டிகையை முன்னிட்டு வெளியாகும் இப்படம், ஜீவாவின் அடுத்த திரையரங்க வெளியீடாக அமையவுள்ளது.

‘கிடா’ திரைப்படத்தின் மூலம் கவனம் பெற்ற இயக்குநர் ரா. வெங்கட் இப்படத்தை இயக்கியுள்ளார். மதுரை மற்றும் அதன் சுற்றுவட்டாரப் பகுதிகளைப் பின்னணியாகக் கொண்டு உருவாகியுள்ள இப்படம், அப்பா–மகன் உறவு, குடும்பப் பாசம் மற்றும் மனித உணர்வுகளை மையமாகக் கொண்டுள்ளது. ‘தெனாவட்டு’ படத்திற்குப் பிறகு ஜீவா மீண்டும் கிராமப்புறப் பின்னணியில் நடிக்கும் படமாகவும் இது அமைந்துள்ளது.

இப்படத்தில் ஜீவாவுக்கு ஜோடியாக ரஜிஷா விஜயன் நடித்துள்ளார். மேலும், லட்சுமி ராமகிருஷ்ணன் உள்ளிட்டோர் முக்கியக் கதாபாத்திரங்களில் நடித்துள்ளனர். படத்தை குமார் தயாரித்துள்ளார். மார்ஷல் ராபின்சன் இசையமைக்க, எம். சுகுமார் ஒளிப்பதிவைக் கையாண்டுள்ளார். நாகூரன் ராமச்சந்திரன் படத்தொகுப்பையும், கே.பி. நந்தபாலன் கலை இயக்கத்தையும் மேற்கொண்டுள்ளனர்.

படத்தின் படப்பிடிப்பு நிறைவடைந்துள்ள நிலையில், தற்போது இறுதிக்கட்டப் பணிகள் நடைபெற்று வருகின்றன. இசை உரிமையை திங்க் மியூசிக் நிறுவனம் பெற்றுள்ளது. தொலைக்காட்சி ஒளிபரப்பு உரிமையை ஜீ தமிழ் நிறுவனமும், ஓடிடி உரிமையை ஜீ5 நிறுவனமும் கைப்பற்றியுள்ளன. டிசம்பர் 24-ஆம் தேதி வெளியாகவுள்ள ‘தகப்பன்’ திரைப்படம் குடும்ப உறவுகளை மையமாகக் கொண்ட கதையுடன் ரசிகர்களைச் சந்திக்கத் தயாராகி வருகிறது.

இதையும் படிங்க: சூர்யா கேரக்டர் என்ன தெரியுமா?‘சீன்’ படத்தின் கதையை வெளியிட்ட ஜித்து மாதவன்!