கிட்டத்தட்ட ஆள்கடத்தல், எமர்ஜென்சியை தாண்டிய சூழல்.. மம்தா பானர்ஜி

Mamata Banerjee: கிட்டத்தட்ட இதுவும் ஆள்கடத்தல்தான்; எமர்ஜென்சி போல் சூழல் உள்ளது என மேற்கு வங்க முன்னாள் முதலமைச்சர் மம்தா பானர்ஜி தெரிவித்துள்ளார்.

மம்தா பானர்ஜி

BySaranya JK

Published on: October 11, 2026 at 6:01 pm

புதுடெல்லி, அக்.11, 2026: டெல்லியில் தலைமைத் தேர்தல் ஆணையர் ஞானேஷ் குமார் பதவி விலகக் கோரியும், வாக்காளர் பட்டியலின் சிறப்பு தீவிரத் திருத்தமான SIR நடைமுறைக்கு எதிராகவும் நடைபெற்ற போராட்டத்தில் பங்கேற்க முயன்ற திரிணமூல் காங்கிரஸ் தலைவர் மம்தா பானர்ஜி, அக்கட்சியின் மூத்த தலைவர்களுடன் காவல்துறையினரால் தடுத்து வைக்கப்பட்டார். சனிக்கிழமை (அக்டோபர் 10) டெல்லி தெற்கு அவென்யூ பகுதியில் உள்ள பேருந்து நிறுத்தம் அருகே அமர்ந்து போராட்டத்தில் ஈடுபட்ட அவரையும், கட்சியின் நாடாளுமன்ற உறுப்பினர்கள் மற்றும் நிர்வாகிகளையும் காவல்துறையினர் அழைத்துச் சென்றனர்.

இதுகுறித்துப் பேசிய மம்தா பானர்ஜி, தங்களைச் சட்டவிரோதமாகக் கடத்திச் சென்றதைப் போன்ற உணர்வு ஏற்பட்டதாகவும், தங்களைச் சிறை வாகனத்தில் ஏற்றிச் சென்றது இதுவே முதல்முறை என்றும் குற்றம்சாட்டினார். டெல்லியில் நிலவும் சூழல் அவசரநிலையையும் தாண்டிவிட்டதாக அவர் விமர்சித்தார்.

மம்தா பானர்ஜியுடன் திரிணமூல் காங்கிரஸ் தலைவர்கள் டெரெக் ஓ பிரையன், தோலா சென், மாநிலங்களவை உறுப்பினர் சமிருல் இஸ்லாம், மக்களவை உறுப்பினர் பிரதிமா மொண்டல் மற்றும் முன்னாள் நாடாளுமன்ற உறுப்பினர் சாகேத் கோகலே ஆகியோரும் தடுத்து வைக்கப்பட்டனர். ஜந்தர் மந்தரில் நடைபெறவிருந்த போராட்டத்தில் பங்கேற்கச் செல்ல அனுமதி மறுக்கப்பட்டதால், தெற்கு அவென்யூ பகுதியில் அமர்ந்து போராட்டம் நடத்தியதாக மம்தா தெரிவித்தார்.

“இந்தியா மற்றும் ஜனநாயகத்தைக் காப்போம்” என்ற பதாகையுடன் போராட்டத்தில் ஈடுபட்டபோது காவல்துறையினர் தங்களை அழைத்துச் சென்றதாகவும், சுமார் இரண்டு மணி நேரம் எங்கு செல்கிறோம் என்பது தெரியாமல் வாகனத்தில் அழைத்துச் செல்லப்பட்டதாகவும் அவர் கூறினார். அரசியல் தலைவர்களை குற்றவாளிகளைப் போல நடத்துவது ஏன் என்றும் அவர் கேள்வி எழுப்பினார். பின்னர் மாலை சுமார் 6.45 மணியளவில் மம்தா உள்ளிட்ட திரிணமூல் காங்கிரஸ் தலைவர்கள் விடுவிக்கப்பட்டனர்.

தடுத்து வைக்கப்பட்ட சம்பவத்தால் கொல்கத்தாவுக்குத் திரும்ப வேண்டிய விமானத்தைத் தவறவிட்டதாகக் கூறிய மம்தா பானர்ஜி, எதிர்க்கட்சிகளின் இந்தியா கூட்டணி சார்பில் திங்கள்கிழமை நடைபெற உள்ள போராட்டத்தில் பங்கேற்பதற்காக டெல்லியில் தங்க முடிவு செய்துள்ளதாகத் தெரிவித்தார். வாக்காளர் பட்டியல் திருத்த நடைமுறை வாக்காளர்களின் உரிமைகளைப் பாதிக்கக்கூடும் என்று எதிர்க்கட்சிகள் குற்றம்சாட்டி வரும் நிலையில், தலைமைத் தேர்தல் ஆணையர் ஞானேஷ் குமார் பதவி விலக வேண்டும் எனக் கோரி இந்தப் போராட்டம் நடத்தப்பட்டது.

போராட்டக்காரர்களைத் தடுத்து வைப்பதன் மூலம் அவர்களின் ஆதரவு மேலும் அதிகரிக்கும் என்றும் மம்தா கூறினார். ஜனநாயகத்தைப் பாதுகாப்பதற்கான போராட்டம் தொடரும் என்றும் அவர் உறுதியளித்தார்.

இதையும் படிங்க : டெல்லியில் எஸ்.எஃப்.ஐ. மாணவர்கள், வழக்கறிஞர்கள் கைது.. தலைமைத் தேர்தல் ஆணையர் ராஜினாமா கோரி போராட்டம்!