ஜெனரிக் மருந்து இறக்குமதிக்கு 200% வரி.. ட்ரம்ப் அறிவிப்பால் பார்மஸி பங்குகள் கடும் சரிவு!

Pharma Stocks Sink : அமெரிக்க அதிபர் டொனால்ட் ட்ரம்ப், ஜெனரிக் மருந்து இறக்குமதிக்கு 200% வரி விதிப்பதாக அறிவித்ததைத் தொடர்ந்து மருந்து நிறுவனப் பங்குகள் சரிவை சந்தித்துள்ளன.

பார்மஸி பங்குகள் கடும் சரிவு

BySaranya JK

Published on: July 22, 2026 at 2:18 pm

மும்பை, ஜூலை 22, 2026 : அமெரிக்க அதிபர் டொனால்ட் டிரம்ப், ஜெனரிக் மருந்து இறக்குமதிக்கு 200% வரி விதிப்பதாக அறிவித்ததைத் தொடர்ந்து, மருந்து நிறுவனப் பங்குகள் இன்று (புதன்கிழமை) காலை குறிப்பிடத்தக்க அழுத்தத்தை சந்தித்தன. இந்த அறிவிப்பின் படி, 2026 ஆகஸ்ட் 1 முதல் இரண்டு ஆண்டுகள் வரி பூஜ்ஜியமாக இருக்கும்; அதன் பிறகு ஒரு வருடத்திற்கு 100% வரியும், பின்னர் 200% வரியும் விதிக்கப்படும்.

இதனால், ‘நிஃப்டி பார்மா குறியீடு’ சுமார் 2% சரிவைக் கண்டுள்ளது. சிப்லா, டாக்டர் ரெட்டிஸ், சன் பார்மா போன்ற பெரிய நிறுவனங்களின் பங்குகள் 1–2% வீழ்ச்சியடைந்துள்ளன. கிளாண்ட் பார்மா, பிரமல் பார்மா, அஜந்தா பார்மா, கிளன்மார்க் போன்ற நடுத்தர மற்றும் சிறிய நிறுவனங்களின் பங்குகள் 2–3% வரை சரிந்துள்ளன.

முன்னாக அமெரிக்க அதிபர் டொனால்ட் டிரம்ப் தனது ‘ட்ரூத் சோஷியல்’ பதிவில், ஜெனரிக் மருந்து உற்பத்தியை மீண்டும் அமெரிக்காவிற்கே கொண்டு வருவதே இக்கொள்கையின் நோக்கம் என்று தெரிவித்துள்ளார். குறிப்பிட்ட காலக்கெடுவுக்குள் உற்பத்தி ஆலைகள் மற்றும் உபகரணங்களை அமைக்காத நிறுவனங்களுக்கு அபராதம் விதிக்கப்படும் என்றும் அவர் எச்சரித்துள்ளார்.

ஆய்வாளர்கள், இந்தியாவின் குறைந்த உற்பத்திச் செலவு, ஜெனரிக் மருந்து ஏற்றுமதியாளர்களுக்கு ஒரு பாதுகாப்பை அளிக்கக்கூடும் என்று கருதுகின்றனர். இருப்பினும், முதலீட்டாளர் மனநிலை பாதிக்கப்பட்டதால், மருந்துத் துறை பங்குகள் விற்பனை அழுத்தத்தில் உள்ளன.

இதையும் படிங்க : நெஸ்லே இந்தியா நிகர லாபம் 48% அதிகரிப்பு.. பங்குகள் 7.5 சதவீதம் உயர்வு!