கச்சத் தீவை தாரை வார்த்த இந்திரா.. எதிர்த்த ஜனா கிருஷ்ண மூர்த்தி.. யார் இவர்?

H Raja: ஜனா கிருஷ்ணமூர்த்தி நினைவு தினத்தில் ஹெச். ராஜா மரியாதை செலுத்தினார். அப்போது இந்திரா காந்தி கச்சத்தீவை தாரை வார்த்த போது அதனை எதிர்த்து ஜனா கிருஷ்ணமூர்த்தி வழக்கு தொடுத்ததையும் அவர் நினைவு கூர்ந்தார்.

ஹெச். ராஜா

H Raja pays tribute to BJP pioneer Jana Krishnamurthy

ByPushpa Gopinath

Published on: September 25, 2025 at 5:11 pm

சென்னை, செப்.25 2025: பாரதிய ஜனதா கட்சியின் முன்னாள் தேசிய தலைவரும், முன்னாள் மத்திய சட்டத்துறை அமைச்சருமான திரு.ஜனா கிருஷ்ணமூர்த்தி அவர்களின் நினைவு தினத்தில் அக்கட்சியின் மூத்தத் தலைவர் ஹெச். ராஜா மரியாதை செலுத்தினார்.

தொடர்ந்து ட்விட்டர் எக்ஸ் தளத்தில் ஹெச். ராஜா, “பாரதிய ஜனசங்க காலத்திலிருந்தே அரசியல் களத்தில் பணியாற்றிவர். டாக்டர். ஷ்யாம் பிரசாத் முகர்ஜி மற்றும் பண்டிட் தீனதயாள் உபாத்யாய ஆகிய இரு மாபெரும் தலைவர்களின் அன்பையும், நம்பிக்கையையும் பெற்றவர்.

1948 ஆம் ஆண்டு ஆர்எஸ்எஸ் இயக்கம் தடை செய்யப்பட்ட போது அதை எதிர்த்து சத்யாகிரகம் செய்து திரு.ஜனா கிருஷ்ணமூர்த்தி அவர்களும் எனது தந்தை பேராசிரியர் ஹரிஹரனும் கைது செய்யப்பட்டு இருவரும் மதுரை சிறையில் ஆறு மாதங்கள் ஒன்றாக இருந்தனர்.

பண்டிட் தீனதயாள் உபாத்யாய அவர்களின் மறைவை தொடர்ந்து 1968 ஆம் ஆண்டு முன்னாள் பாரத பிரதமரும், பாரத ரத்னாவுமான அடல் பிஹாரி வாஜ்பாய் அவர்கள் ஜனசங்க பணிகளை தீவிரப்படுத்த நாடு முழுவதும் முழுநேரமாக பணிபுரிய தலைவர்கள் முன்வர வேண்டுமென அறைகூவல் விடுத்த போது தனது வழக்கறிஞர் பணியை துறந்து கட்சியின் முழுநேர ஊழியராக பணியாற்றியவர்” எனத் தெரிவித்துள்ளார்.

கச்சத்தீவை தாரை வார்க்க எதிர்ப்பு

மேலும், “இந்திராகாந்தி அவர்கள் கச்சத்தீவை இலங்கைக்கு தாரை வார்த்த போது அதை எதிர்த்து உயர்நீதிமன்றத்தில் வழக்கு தொடர்ந்து சட்டப் போராட்டத்தை முன்னெடுத்தவர்.

1980 ஆம் ஆண்டு பாரதிய ஜனதா கட்சி உருவான போது தேசிய செயலாளராகவும், தென்பாரத பொறுப்பாளராகவும் பொறுப்பேற்று 1980 – 1990 வரை தமிழ்நாடு, கேரளா, கர்நாடக, ஆந்திரா மாநிலங்களில் கட்சிக்கான அடித்தளத்தை உருவாக்க களப்பணியாற்றியவர்” என ஹெச். ராஜா குறிப்பிட்டுள்ளார்.

இதையும் படிங்க : நிலம், வீட்டு மனை வழிகாட்டி மதிப்பு பெயரில் வழிப்பறி.. ஓ.பன்னீர் செல்வம் கடும் கண்டனம்!