ஜி.எஸ்.டி வரம்புக்குள் பெட்ரோல், டீசல் வருமா? மத்திய அரசு பதில்

GST: சரக்கு மற்றும் சேவை வரி (ஜி.எஸ்.டி) வரம்புக்குள் பெட்ரோல், டீசல் வருமா? என்ற கேள்விக்கு மத்திய அரசு பதிலளித்துள்ளது.

இந்திய நாடாளுமன்றம்

BySaranya JK

Published on: July 22, 2026 at 6:11 pm

புதுடெல்லி, ஜூலை 22, 2026: 2025-26 நிதியாண்டில் வாகன எரிபொருள்கள் மீதான கலால் வரி, செஸ் மற்றும் கூடுதல் கட்டணங்கள் மூலம் மத்திய அரசு ரூ. 3.27 லட்சம் கோடியை வசூலித்துள்ளது. இது முந்தைய ஆண்டை விட 10% அதிகமாகும். அதாவது, சமீபத்தில் உள்நாட்டுப் பயன்பாட்டிற்கான பெட்ரோல் மற்றும் டீசல் மீதான கலால் வரி குறைக்கப்பட்டிருந்தாலும், வருவாய் உயர்ந்துள்ளது.

மேற்கு ஆசியாவில் நிலவிய போர்ச் சூழலால் கச்சா எண்ணெய் விலை அதிகரித்ததைத் தொடர்ந்து, அரசு மார்ச் மாதத்தில் பெட்ரோல் மற்றும் டீசல் மீதான மத்திய கலால் வரியை லிட்டருக்கு தலா ரூ. 10 குறைத்தது. இந்த நடவடிக்கையால் ஆண்டு வருவாயில் சுமார் ரூ. 1 லட்சம் கோடி இழப்பு ஏற்படும் என மதிப்பிடப்பட்டுள்ளது.

நிதியமைச்சகத்தின் தரவுகளின்படி, 2025 நிதியாண்டில் (FY25) இவ்வரி இனங்கள் மூலம் ரூ. 2.96 லட்சம் கோடி வசூலிக்கப்பட்டது. 2024 நிதியாண்டில் (FY24) இதே அளவு வசூலாகியிருந்தது. 2023 நிதியாண்டில் (FY23) ரூ. 3.10 லட்சம் கோடி, 2022 நிதியாண்டில் (FY22) ரூ. 3.84 லட்சம் கோடி வசூலாகியிருந்தது.

பெட்ரோல், டீசல், இயற்கை எரிவாயு மற்றும் விமான எரிபொருள் (ATF) ஆகியவை தற்போது ஜிஎஸ்டி (GST) வரம்பிற்கு வெளியே உள்ளன. 2021 செப்டம்பர் 17-ஆம் தேதி நடைபெற்ற 45-வது ஜிஎஸ்டி கவுன்சில் கூட்டத்தில் பெட்ரோல் மற்றும் டீசலை ஜிஎஸ்டி வரம்பிற்குள் கொண்டுவருவது குறித்து விவாதிக்கப்பட்டது. ஆனால், அப்போது கவுன்சில் “இது சரியான நேரம் அல்ல” என்று கருதி, எரிபொருட்களை ஜிஎஸ்டி வரம்பிற்குள் சேர்க்காமல் வைத்திருப்பதாக நிதித்துறை இணையமைச்சர் பங்கஜ் சவுத்ரி தெரிவித்துள்ளார்.

இதையும் படிங்க : நெஸ்லே இந்தியா நிகர லாபம் 48% அதிகரிப்பு.. பங்குகள் 7.5 சதவீதம் உயர்வு!