ஹெச்.டி.எஃப்.சி. வங்கியின் நிகர லாபம் 4.7% உயர்வு.. ரூ.19,510 கோடி பதிவு!

HDFC Bank Q2 Profit Growth: ஹெச்.டி.எஃப்.சி. வங்கியின் நிகர லாபம் 4.7% உயர்வு கண்டு, ரூ.19,510 கோடியாக பதிவாகியுள்ளது.

ஹெச்.டி.எஃப்.சி வங்கி

BySaranya JK

Published on: October 18, 2026 at 1:36 pm

சென்னை, அக்.18, 2026: இந்தியாவின் முன்னணி தனியார் வங்கியான ஹெச்.டி.எஃப்.சி. வங்கி, 2026–27 நிதியாண்டின் இரண்டாவது காலாண்டுக்கான நிதி முடிவுகளை வெளியிட்டுள்ளது. ஜூலை முதல் செப்டம்பர் வரையிலான காலாண்டில், வங்கியின் தனிப்பட்ட நிகர லாபம் கடந்த ஆண்டின் இதே காலகட்டத்துடன் ஒப்பிடுகையில் 4.7 சதவீதம் அதிகரித்து ரூ.19,509.96 கோடியாக உயர்ந்துள்ளது. கடந்த ஆண்டு இதே காலாண்டில் லாபம் ரூ.18,641.28 கோடியாக இருந்தது.

வங்கியின் நிகர வட்டி வருமானம் (NII) 9.7 சதவீதம் அதிகரித்து ரூ.34,619 கோடியாக உயர்ந்துள்ளது. கடன்கள் மூலம் கிடைக்கும் வட்டி வருவாயில் ஏற்பட்ட வளர்ச்சி இதற்கு முக்கியக் காரணமாகும். அதே நேரத்தில், முதலீடுகள் மற்றும் பத்திரங்களின் வர்த்தகம் மூலம் கிடைத்த வருவாய் குறைந்ததால், லாப வளர்ச்சி ஓரளவு கட்டுப்பட்டது.

வங்கியின் கடன் வழங்கல் 16.3 சதவீதமும், வைப்புத்தொகை 18.8 சதவீதமும் ஆண்டுக்கு ஆண்டு வளர்ச்சி கண்டுள்ளன. வங்கியின் மொத்தக் கடன்கள் மற்றும் வைப்புத்தொகை அதிகரித்திருப்பது அதன் வணிகச் செயல்பாடுகள் விரிவடைந்துள்ளதைக் காட்டுகிறது.

இதற்கிடையில், வங்கியின் வாராக்கடன் விகிதத்திலும் முன்னேற்றம் ஏற்பட்டுள்ளது. செப்டம்பர் இறுதியில் மொத்த வாராக்கடன் விகிதம் 1.11 சதவீதமாகக் குறைந்துள்ளது. ஜூன் மாத இறுதியில் இது 1.17 சதவீதமாகவும், கடந்த ஆண்டு செப்டம்பரில் 1.24 சதவீதமாகவும் இருந்தது.

இந்த நிதி முடிவுகள் வெளியாகியுள்ள நிலையில், வங்கியின் நிர்வாகத்திலும் மாற்றம் ஏற்பட உள்ளது. துணை நிர்வாக இயக்குநர் கைசாத் பரூச்சா, டிசம்பர் 31ஆம் தேதியுடன் பணியிலிருந்து விலக உள்ளதாக வங்கி தெரிவித்துள்ளது. அக்டோபர் 27ஆம் தேதி அனுப் பாக்சி நிர்வாக இயக்குநர் மற்றும் தலைமைச் செயல் அதிகாரியாகப் பொறுப்பேற்க உள்ளார்.

இதையும் படிங்க : தீபாவளிக்கு முன் 4 புதிய பீர்கள் அறிமுகம்.. தமிழ்நாடு அரசு